चाँगुनारायण, १३ साउन : चाँगुनारायण मन्दिरमा आज बिहानैदेखि दर्शनार्थीको भीड लागेको छ । विश्व सम्पदा सूर्चीमा रहेको विश्व प्रसिद्ध धार्मिक महत्व बोकेको चाँगुनारायण मन्दिरमा आज नाग पञ्चमीको भेला भर्न स्थानीयदेखि बिभिन्न जिल्लाबाट आएका भक्तजनको घुइचो लागेको हो ।

चाँगुनारायण मन्दिर आसपासका बासिन्दाले चाँगुनारायण मन्दिर पुगेर पूजा एवं दर्शन गरेपछि आफ्नो घरघरमा नाग टाँस्ने प्रचलन रहदै आएको छ । बिहानैदेखि मध्यपुरथिमिबाट आएको गुँला बाजाले मन्दिर प्रर्दक्षिणा गरेको छ ।

चाँगुनारायण मन्दिरबाट दक्षिततर्फ ओरालोमा रहेको ऐतिहासिक शंख दह (साङ्ग दह) मा स्नान गर्न आउनेको पनि ठूलो भीड लागेको छ । शंख दलमा स्नान गर्ने, पूज ागर्ने र दान गर्नेको भीड लागेको चाँगनुारायणमा पुजारी अभास राजोपाध्यायले जानकारी दिनुभयो । शंखदहमा स्नान गरेर चाँगुनारायण मन्दिरमा आएर शिव र विष्णुको पुजा गर्ने परम्परा रहेको उहाँले बताउनुभयो ।

चाँगुनारायण मन्दिरका मूल पुजारी चक्रधरानन्द राजोपाध्यायले हरेक वर्ष नाग पञ्चमीमा बिहानैदेखि दिनभर दर्शनार्थीको भीड लाग्ने बताउनुभयो । उहाँले मन्दिर भित्र भक्तजनले एकै पटक शिव र विष्णुको दर्शन र पुजा गर्ने बताउनुभयो ।

उहाँले भन्नुभयो, “नाग पञ्चमी नाग देवतासंग सम्बन्धित छ । नाग र महादेव र विष्णुसंग सम्बन्धित भएकाले मन्दिर आउनेहरुले मन्दिर परिसर भित्र रहेको किलेश्वर महादेव मन्दिरमा पूजा एवं दर्शन गर्नु हुन्छ । दर्शनार्थीले चाँगुनारायण मन्दिरमा पनि भगवाण विष्णुको पूजा एवं दर्शन गर्नुहुन्छ । त्यसलै आज दिनभर दर्शनार्थीको मेला भर्न भीड लाग्ने गर्छ ।”

नगरपालिकाका प्रमुख जीवन खत्रीले मन्दिरको मेला एवं पर्वले आन्तरिक पर्यटनको प्रबद्र्धनमा ठूलो टेवा पुगेको बताउनुभयो । उहाँले चाँगुनारायण नगरपालिकाले सञ्चालन गरेको नगरकोट भ्रमण वर्ष–२०८२ लाई धार्मिक पर्यटनसंग जोडेको बताउदै यस्ता चाडपर्वले भ्रमण वर्ष सफल पार्ने मात्रै नभई विश्वभरका पर्यटकलाई यसतर्फ आकर्षित गर्ने विश्वास व्यक्त गर्नुभयो । नगरपालिकाले भ्रमण वर्ष अबधीभर धार्मिक पर्यटनको विकास, संरक्षण एवं प्रचारमा सक्रिय रहने बताउनुभयो ।

 नगरकोट भ्रमण वर्ष–२०८२ सचिवालयकी सदस्य मिरा तिमिल्सिनाले सचिवालयको टोली बिहानै मन्दिर पुगेर भ्रमण वर्षको प्रचार एवं मेलाको अवलाकन गरेको बताउनुभयो । चाँगुनारायण नगरपालिका पर्यटन सूचना केन्द्रकी प्रमुख सविता बस्नेतले मन्दिरमा बिहानैदेखि आन्तरिक पर्यटकको घुईचो लागेको बताउनुभयो । उहाँले शंख दहमा स्नान गर्ने र किलेश्वर महादेव मन्दिरसंगै चाँगुनारायण मन्दिरमा दर्शन गर्ने दर्शनार्थीको घूइचो लागेको बताउनुभयो ।