वागेश्वरी, ५ साउन । चाँगुनारायण नगरपालिका–७ वागेश्वरीस्थित बागेहिटी देवी मन्दिर परिसरमा रहेको  त्रिलोकेश्वर महादेव मन्दिरबाट पशुपतिनाथ मन्दिरसम्म सुरु भएको कलश यात्रा सम्पन्न भएको छ ।

मन्दिरमा सुरु भएको एक महिने साउने मेलाको अवसरमा आज सोमबार ११ बजेबाट सयौंको संख्यामा वागेश्वरीस्थित वागेहिटीबाट सुरु भएको कलश (जल) यात्रा पशुपति मन्दिरसम्म पुगेको थियो । पशुपतिमा जलार्पण गरि पुनः पशुपति मन्दिरबाट जल भरेर फर्केको कलश यात्रा त्रिलोकेश्वर महादेव मन्दिरमा ल्याएर जलार्पण गरिएको महायज्ञ आयोजना समितिका प्रचार संयोजक रमेश अधिकारीले जानकारी दिनुभयो ।

नगरकोट भ्रमण वर्ष–२०८२ को अवसर पारेर वागेहिटी संरक्षण समितिद्वारा आज सोमबारदेखि वागेहिटीस्थित त्रिलोकेश्वर महादेव मन्दिरमा सञ्चालन गरेको श्रावणी महोत्सवको पहिलो दिन पशुपतिसम्मको कलश यात्रा गरि जलार्पण गरिएको उहाँले जानकारी दिनुभयो ।

तीनतले महादेवको नाममा प्रसिद्ध त्रिलोकेश्वर महादेव मन्दिरमा श्रावणी महोत्सवसंगै साउन ५ गतेदेखि १९ गतेसम्म शिव पुराण ज्ञान महायज्ञ र साउन १९ गतेदेखि २६ गतेसम्म नारायण महायज्ञको आयोजना हुने बताउदै उहाँले महायज्ञमा विदुषी वाचिका यशोधा देवीबाट कथा प्रवचन हुने जानकारी दिनुभयो ।  महोत्सवको मंगलबार चाँगुनारायण नगरपालिकाका  नगर प्रमुख जीवन खत्रीबाट उद्घाटन गरेसंगै महोत्सव एवं कथावाचन सुरु हुनेछ ।