चाँगुनारायण, १५ भदौ : चाँगुनारायण नगरपालिकाले यही भदौ १७ गतेदेखि २२ गतेसम्म ब्राजिलमा हुने विश्व च्याम्पियनसिपमा भाग लिन त्यसतर्फ प्रस्थान गरेकी उसु खेलाडी सुस्मिता तामाङ्गलाई आज शुभकामना प्रदान गर्दै विदाई गरेको छ ।

आज आइतबार नगरपालिकामा आयोजना गरेको विदाई तथा शुभकामना प्रदान कार्यक्रममा नगर प्रमुख जीवन खत्री र उपप्रमुख रमेश बुढाथोकीको सन्देश सहित नगरपालिकाको टोलीले बिदाई एवं शुभकामना प्रदान गरेको नगर खेलकुद संयोजक रघु केसीले जानकारी दिनुभयो ।

नगर प्रमुख खत्री र उपप्रमुख बुढाथोकीले नगरपालिका र देशकै नाम उच्च राख्ने गरि सफलता प्रदान गर्न सक्ने गरि मेडल हासिल गर्न शुभकामना दिनु भएको उहाँले जानकारी दिनुभयो ।

नगरपालिकामा आयोजना गरेको कार्यक्रममा नगरपालिकाका प्रमुख प्रशासकीय अधिकृत मोहनकुमार श्रेष्ठले खेलाडी तामाङ्गलाई खादा ओढाएर बिदाई गर्दै मेडल जितेर नगरपालिकाको नाम उच्च राख्न सफलता प्राप्त गर्ने शुभकामना व्यक्त गर्नुभयो ।

त्यसैगरि शिक्षा शाखाका प्रमुख जनार्दन रिजाल, वरिष्ठ शाखा अधिकृत एवं सूचना अधिकृत अनुप लामिछाने, अधिकृत सुरज पौडेल, नगर खेलकुद संयोजक रघु केसीलगायत कर्मचारीहरुले शुभकामना दिदै विदाई गर्नु भएको छ ।

कार्यक्रममा नगर खेलकुद विकास समितिका सदस्यहरु नरेन्द्र खड्का, करुणा राउत भारती, खेलकुद प्रशिक्षकहरु सौरभ शाखकर्मी, प्रदीप ढकाल, राजन रसाईली, प्रेमकुमार लामा, सागर श्रेष्ठलगायतले विदाई गर्नु भएको थियो । समितिका संयोजक केसीले विमानस्थल पुगेर खेलाडी तामाङ्गलाई शुभकामनासहित विदाई गर्नु भएको छ ।

उसु खेलाडी सुस्मिता तामाङ्गले अहिलेसम्म नेपालमा भएको १३ औँ. दक्षिण एशियाली खेल–२०१९ मा स्वर्णपदक, भारतमा भएको १२ औं दक्षिण एशियन खेलमा रजत पदक, छैठौं, सार्ता, आठौ र नवौं राष्ट्रिय खेलमा स्वर्ण पदक, कोरियामा भएको १७ औँं एशियान खेल र इन्डोनेसियामा भएको १८ औ एशियन खेल सहभागिता जनाउनु भएको थियो ।